ក្បួនតម្រាទស្សន៍ទាយជោគជតារាសីទាំង ១២ ឆ្នាំរបស់ចិនប្រចាំឆ្នាំ វក ២០១៦
ភ្នំពេញ ប៉ុស្តិ៍ នាំអារម្មណ៍មិត្តអ្នកអានមកជួបជាមួយនឹងហោរាសាស្ត្រ ចិន ដែលមានវ័យ ៦៥ ឆ្នាំ លោក អ៊ៅ ណន ដែលមានអសយដ្ឋានផ្ទះចិនសែទល់មុខចំក្លោងទ្វាខាងកើតនៃវត្តព្រះពុទ្ធឃោសាចារ្យហៅវត្តចិនដំដែក ស្ថិតនៅក្នុងសង្កាត់វត្តភ្នំខណ្ឌដូនពេញ។
ហោរាសាស្ត្រចិន វ័យហុកប្លាយរូបនេះមានបទពិសោធទស្សន៍ទាយ ១៨ ឆ្នាំ បានធ្វើការបកស្រាយជោគជតារាសីសង្ខេបពីដំណើរជីវិតនៃឆ្នាំនីមួយៗដោយមានការប្រាប់ពីហេតុភេទទាំងឡាយដូចជាការឆុងឆ្នាំនានាក្នុងអំឡុងឆ្នាំ ២០១៦។
ខាងក្រោមនេះ គឺជាការទស្សន៍ទាយនូវជោគជតារាសីប្រចាំឆ្នាំសម្រាប់ឆ្នាំនីមួយៗ៖
១. ឆ្នាំជូត
សម្រាប់លោកអ្នកកើតឆ្នាំ ជូត នៅឆ្នាំថ្មីនេះមានរាសីមធ្យម។ រាល់ការប្រកបមុខរបររកស៊ី និងបំពេញការងារនានាមានដំណើរការល្អចាប់ដើមឆ្នាំតែលុះទៅដល់ខែ ៦ ឬ ខែ ៧ តាមចន្ទគតិចិន (ចន្លោះខែកក្កដា ឬ សីហា) ទៅនឹងមានភាពអាក់ខានចូលលាភ និងទ្រព្យធនវិញនោះគឺរកមិនសូវបានហើយមានការចាយវាយធូរៗ ឬលើសចំណូលទៀត និងកុំឆាប់ជឿគេពេកអាចខាតទ្រព្យ ដូច្នេះត្រូវចេះវិនិច្ឆ័យត្រង់ចំណុចនេះឲ្យបានត្រឹមត្រូវ។ ចំពោះអ្នកដែលនៅលីវពុំទាន់មានគូទាំងប្រុស និងស្រីអាចមានពេលវេលាល្អក្នុងការរកគូស្រករបានមិនមានភាពសៅហ្មងអ្វីឡើយ។
កក្តាសំខាន់បំផុតគួរប្រយ័ត្ន បើតាមក្បួនចិនចាំបាច់ត្រូវរៀបចំជើងធូបចង្ក្រានបាយឲ្យបានល្អ ដោយមិនឲ្យមានបង្គន់នៅចំពីមុខ ឬស្ថិតនៅខាងក្រោមបង្គន់ ជាដើម។
២.ឆ្នាំឆ្លូវ
លោកអ្នកដែលកើតឆ្នាំឆ្លូវសម្រាប់ឆ្នាំវកនេះ មានរាសីល្អបង្គួរ។ ការប្រកបរបរ និងបំពេញការងារផ្សេងៗដាក់លូតដុះដាលទៅមុខ និងមានជោគជ័យគួរសម តែក៏តោងយកនូវការប្រុងប្រយ័ត្នជាប់ដែរ។ ចំពោះអ្នកមិនទាន់មានគូកន ទាំងប្រុស ទាំងស្រីដល់វ័យរៀបការនៅឆ្នាំនេះអាចរកវេលាដើម្បីគិតគូរបានគឺគ្មានឧបសគ្គឡើយ តែពេលាមង្គលការនៅខែវស្សាមិនល្អឡើយ។
លក្ខណៈពិសេសម្យ៉ាងទៀតសម្រាប់អ្នកកើតឆ្នាំឆ្លូវនាឆ្នាំវកនេះគឺជាមនុស្សគិតគូរបានម៉ត់ចត់ច្បាស់លាស់ មិនជឿអ្នកដទៃដោយងាយ ឬខ្វះការពិចារណារកហេតុ និងផលនោះ ហើយឆ្លៀតរៀបចំជើងធូបចង្ក្រានបាយឲ្យបានត្រឹមត្រូវតាមក្បូនទៀតនោះរឹតតែប្រសើរ។
៣.ឆ្នាំខាល
អ្នកកើតឆ្នាំខាលសម្រាប់ឆ្នាំថ្មីឆ្នាំវកនេះ មានរាសីល្អបង្គួរ។ បើទោះបីឆ្នាំខាលមានការឆុងខ្លាំងជាមួយនឹងឆ្នាំវក និងលំបាកចិត្តយ៉ាងណាក្តី តែប្រសិនបើលោកអ្នកមានការរៀបចំទៅតាមក្បួនខ្នាតចិនសែបានត្រឹមត្រូវនោះ នឹងក្លាយជាពេលវេលាដ៏ល្អបំផុតវិញសម្រាប់ការប្រកបរបររកស៊ីទទួលទាន ឬការបំពេញការងារគឺទ្រព្យធននឹងហូរចូលអាចក្លាយជាអ្នកមានទ្រព្យស្តុកស្តម្ភផងដែរ។
ពិសេសនោះត្រូវរៀបចំទីតាំងជើងធូបចង្រានបាយឲ្យបានល្អ ដោយមិនឲ្យនៅក្រោយបង្គន់ ឬនៅខាងក្រោមបង្គន់ទេ និងរោងទេវតានៅមុខផ្ទះមិនត្រូវសង់នៅខាងស្តាំដៃពេលដើរចូលឡើយ។ ដោយសារឆ្នាំខាលត្រូវឆុងខ្លាំងនឹងឆ្នាំវក លោកអ្នកត្រូវទៅធ្វើពិធីកាត់គ្រោះចេញទើបជាការល្អ ខណៈថ្ងៃល្អបំផុតសម្រាប់ពិធីគឺ នៅថ្ងៃទី ៩ ខែ កុម្ភៈ ឆ្នាំ ២០១៦ ខាងមុខនេះ ខណៈម៉ោងដ៏ល្អចាប់ពីម៉ោង ២ រសៀលរហូតដល់ម៉ោង ៥។
ចំពោះគូស្នេហ៍ ឬគូស្រករវិញ បើតាមក្បូនចិនឆ្នាំដែលមានការឆុងដូច្នេះគឺជាត្រណមហាមដាច់ខាតមិនឲ្យរៀបចំពិធីមង្គលការឡើយ។
៤.ឆ្នាំថោះ
សម្រាប់លោកអ្នកកើតឆ្នាំថោះនៅឆ្នាំថ្មីនេះ មានរាសីល្អខ្លាំង។ រាល់ការប្រកបរកស៊ី ឬការបំពេញការងារផ្សេងៗមានជោគជ័យ និងសំណាងល្អហូរចូលរកស៊ីមានបានមិនដាច់ឡើយ ដោយសារឆ្នាំនេះមិនមានការឆុងនឹងឆ្នាំវក។ ចំណែកបុរសស្រ្តីទាំងឡាយដែលនៅលីវនោះ គឺជាពេលវេលាដ៏ល្អសម្រាប់ការរកដៃគូ ឬគូស្រករពោលការរៀបចំមង្គលការតពូជពង្សវង់ត្រកូលបានក្នុងសង្គមគ្រួសារ។
កត្តាសំខាន់នោះ ក៏ត្រូវប្រយ័ត្ននឹងការរៀបចំជើងធូបចង្ក្រានបាយឲ្យបានត្រឹមត្រូវផងដែរ សម្រាប់ឆ្នាំនេះគឺនឹងជួយនាំលាភសំណាងកាន់តែច្រើនថែមទៀត។
៥.ឆ្នាំរោង
អ្នកកើតឆ្នាំរោង មានរាសីល្អបង្គួរ។ រាល់ការប្រកបរកស៊ី ឬការបំពេញការងារផ្សេងៗមានជោគជ័យ គួរសម និងមានលាភសំណាងហូរចូល តែដល់ខែ ៦ (ខែកក្កដា) ហាក់ដូចជាមានការឆុងនឹងឆ្នាំវក ត្រូវមានការធ្វើពិធីកាត់គ្រោះដែលឆុងនោះចេញទើបជាការល្អព្រោះឆ្នាំនេះត្រូវការទឹកទើបមានភាពត្រជាក់ត្រជំ។
ចំណែកឯការរកគូស្រករវិញ មិនមានអ្វីជាឧបសគ្គឡើយគឺអាចរកអ្នកយល់ចិត្តយល់ថ្លើមក្តីស្នេហ៍សម្រាប់ត្រើយមង្គលការបាន។
៦.ឆ្នាំម្សាញ់
លោកអ្នកកើតនៅឆ្នាំម្សាញ់ រាសីនៅឆ្នាំវកនេះស្រុតចុះ គឺមិនល្អឡើយ។ លោកអ្នកតែងមានចិត្តច្របួកច្របល់ខ្លាំង និងមានលក្ខណៈស៊ាំញ៉ាំច្រើន ជាពិសេសប្រភេទមនុស្សចូលចិត្តគិត និងខ្វល់ខ្វាយនឹងទ្រព្យសម្បត្តិខ្លួនឯង ខ្លាចបាត់បង់ ឬមានគេមកប៉ុនប៉ង ដែលជាហេតុរំខានទៅដល់ការប្រកបរបរទទួលទាន និងកិច្ចការប្រចាំថ្ងៃនាពេលបច្ចុប្បន្នផងដែរ។
ចំពោះអ្នកនៅលីវ ទាំងប្រុស និងស្រី អាចរកវេលារៀបការបាន តែហាមរៀបចំនៅខែវស្សាឲ្យសោះគឺនឹងអាចខាតបង់នូវទ្រព្យធនក្នុងផ្ទះខ្លួន។
៧.ឆ្នាំមមី
ចំពោះលោកអ្នកកើតឆ្នាំមមី មានរាសីល្អណាស់សម្រាប់ឆ្នាំថ្មីឆ្នាំវកនេះ។ ការប្រកបមុខរបររកស៊ី និងការបំពេញការងារផ្សេងៗគឺមានទ្រព្យធនរកបានជាហូរហែមិនចេះដាច់ មានទេវតាទ្រព្យនាំសំណាងឲ្យ ទោះបីជាតិចក្តី ច្រើនក្តី។
ចំណែករឿងរកវេលារៀបចំមង្គលការវិញគឺសក្តិសមបំផុតព្រោះថា បុរស ឬស្រ្តីកើតឆ្នាំមមីមានជោគជតារសីស៊ីគ្នាខ្លាំងណាស់នឹងឆ្នាំវក ប្រសិនបើបានរៀបការនឹងមានភាពត្រជាក់ត្រជំ ចម្រុងចម្រើន តពូជពង្សវង់ត្រកូល។ រឹតតែពិសេសទៀតនោះ លោកអ្នកនឹងកើននូវទ្រព្យធនលើសលប់ ប្រសិនបើចេះរៀបចំនូវជើងធូបជើងក្រានបាយឲ្យចំទិស និងត្រឹមត្រូវតាមក្បួនហុងស៊ុយ។
៨.ឆ្នាំមមែ
រាសីសម្រាប់អ្នកកើតឆ្នាំមមែ នៅឆ្នាំវកនេះ ល្អបង្គរ។ ដោយសារថ្ងៃស៊យ និងគ្រោះកាចគ្រោះភ័យទាំងឡាយបានឆ្លងផុតនៅឆ្នាំចាស់រួចអស់ហើយនោះ ឆ្នាំថ្មីនឹងនាំមកនូវជោគជ័យ និងនាំនូវសំណាងល្អមកវិញដោយផ្តើមចេញពីការគិតខ្លាំងលើរាសីជើងធូបផ្ទះបាយគឺត្រូវរៀបចំកុំឲ្យនៅខាងក្រោយបង្គន់ ឬបន្ទប់ទឹក និងនៅខាងក្រោមបង្គន់ ឬបន្ទប់ទឹកឲ្យសោះព្រោះនិមិត្តសញ្ញាខាតលាភ។ ការងារ ឬការរកស៊ីនានាមានភាពរលូនជាសន្សឹមៗទៅមុខជានិច្ច។
ចំណែកអ្នកដែលនៅលីវវិញនោះ ក៏ដល់ពេលវេលាត្រូវរៀបចំនូវពិធីមង្គលការទៅតាមការគួរហើយ។
៩.ឆ្នាំវក
អ្នកកើតឆ្នាំវកមានរាសីល្អណាស់ បើទោះបីជាត្រូវឆុងគ្នារាវងឆ្នាំវក និងវកដូចគ្នាហើយមានលក្ខណៈពិបាកយ៉ាងណាក្តី តែអាចនឹងក្លាយជាលាភ និងមានទ្រព្យធនសម្បូរហូរហៀរវិញក្នុងករណីលោកអ្នកបានរៀបចំត្រឹមត្រូវតាមក្បួនខ្នាតនោះ។ តែលោកអ្នកកើតឆ្នាំវកត្រូវធ្វើពិធីកាត់គ្រោះឲ្យបានបីដងទើបអាចឆ្លងផុតនូវគ្រោះឧបទ្រពទាំងឡាយ ដោយថ្ងៃល្អបំផុតសម្រាប់ពិធីគឺលើកទី ១ នៅថ្ងៃទី ៩ ខែ កុម្ភៈ ទី ២ ខែតុលា និងលើកទីបីចុងឆ្នាំ ២០១៦ គឺនៅចុងខែ មករា ឆ្នាំ ២០១៧ ខាងមុខ ខណៈម៉ោងដ៏ល្អ ចាប់ពីម៉ោង ២ រសៀលរហូតដល់ម៉ោង ៥។
ចំពោះវេលារកគូស្រករវិញដូចជាមិនល្អឡើយ ដោយសារជាឆ្នាំឆុងគ្នានេះបើតាមក្បួនខ្នាតចិនសែគឺជាត្រណម។
១០.ឆ្នាំរកា
សម្រាប់លោកអ្នកកើតឆ្នាំរកា រាសីស្រុតចុះខ្លាំង។ ចំពោះការរកគូស្រករវិញ បុរស ឬស្រ្តី កើតឆ្នាំរកា មិនអាចចាប់គូជាមួយនឹងបុរស ឬស្រ្តីដែលកើតឆ្នាំវកបានឡើយ ខណៈឆ្នាំទាំងពីរនេះមានធាតុភ្លើងដូចគ្នា ប្រសិនបើបានរៀបការនោះគឺរស់នៅមិនសូវជាបានក្តីសុខសប្បាយឡើយគឺច្រើនតែទាស់ចិត្ត ទាស់គំនិតគ្នាឥតស្រាកស្រាន្ត និងមានអារម្មណ៍មួម៉ៅក្តីក្រហាយ។
រីឯ ការប្រកបមុខរបរ ឬបំពេញការងារត្រូវប្រុងប្រយ័ត្នឲ្យមែនទែនព្រោះអាចខាតបង់លាភ ឬឋានៈបុណ្យសក្តិ គប្បីត្រុវចេះគិតពិចារណាឲ្យសព្វជ្រុងជ្រោយសិន មុននឹងនិយាយហារស្តី ឬក៏មិនត្រូវហ៊ានប្រថុយប្រថានខ្លាំងពេកនោះឡើយ។
១១.ឆ្នាំច
លោកអ្នកដែលកើតឆ្នាំច សម្រាប់រាសីឆ្នាំនេះមធ្យម។ លោកអ្នកបានឆ្លងផុតនូវរាល់ទុក្ខសោក រឿងសៅហ្មងចិត្ត និងគ្រោះកាចចង្រៃទាំងពួងនៅក្នុងឆ្នាំចាស់បានសាបរលាបអស់ហើយ ដោយចាប់យកនូវផលលាភ និងសំណាងមកវិញសន្សឹមៗគួរសម មិនមានឧបសគ្ករារាំងទៀតឡើយ សម្រាប់ការប្រកបរបររកស៊ី ឬបំពេញការងារផ្សេងៗ។
ចំណែកពេលវេលារកគូស្នេហ៍ ឬគូស្រករនោះក៏ជាការល្អសម្រាប់ផ្តើមនូវសម្ព័ន្ធភាពសម្លឹងរកមើលម្ចាស់បេះដូងដោយចំណងនៃស្ពានមង្គលការ។ ការរៀបចំជើងធូបចង្ក្រានបាយឲ្យបានត្រឹមត្រូវសម្រាប់ឆ្នាំនេះ នឹងជួយនាំលាភសំណាងកាន់តែច្រើនព្រោះចិនតែងមានលំនាំមួយមិនចោលជើងក្រានបាយឡើយ។
១២.ឆ្នាំកុរ
សម្រាប់លោកអ្នកដែលកើតឆ្នាំកុរ រាសីឆ្នាំនេះស្រុតចុះខ្លាំង។ កត្តាសំខាន់គឺឆ្នាំកុរនេះត្រូវឆុងខ្លាំងនឹងឆ្នាំវក ដូច្នេះត្រូវប្រយ័ត្នប្រយែងឲ្យបានខ្លាំងមែនទែន។ លោកអ្នកត្រូវទៅធ្វើពិធីកាត់គ្រោះចេញទើបជាការល្អ ខណៈថ្ងៃល្អបំផុតសម្រាប់ពិធីគឺនៅថ្ងៃទី ៩ ខែ កុម្ភៈ ឆ្នាំ ២០១៦ ខាងមុខនេះ ខណៈម៉ោងដ៏ល្អចាប់ពីម៉ោង ២ រសៀលរហូតដល់ម៉ោង ៥។ ចំពោះគូស្នេហ៍ ឬគូស្រករវិញ បើតាមក្បូនចិន ឆ្នាំណាដែលមានការឆុងដូច្នេះគឺជាត្រណមហាមដាច់ខាតមិនឲ្យរៀបចំពិធីមង្គលការនោះឡើយ។
ការរៀបចំផ្ទះ និងគ្រឿងរណ្ដាប់សែន
បើតាមក្បួនតម្រាចិនសម្រាប់ឆ្នាំវកឆ្នាំថ្មីឆ្នាំ ២០១៦ នេះជាសត្វស្វាធាតុភ្លើង មានអត្តចរិតជាសត្វមានចិត្តមហិចតាធំ ចូលចិត្តការផ្សេងព្រេងខ្លាំង តែឆាប់ខឹងសម្បារបន្តិច ហើយក្នុងចំណោមឆ្នាំសត្វទាំង ១២ មានឆ្នាំចំនួនបួនឆុងនឹងឆ្នាំ វក រួមមានឆ្នាំ វក ខាល ម្សាញ់ និង កុរ ខណៈឆ្នាំ ខាល និង កុរ ឆុងជាងគេជាមួយនឹងឆ្នាំវក។
ចំពោះវត្ថុ និងគ្រឿងលាភសំណាងសម្រាប់ឆ្នាំ វក ឆ្នាំ ២០១៦ នេះរួមលេខនាំសំណាងល្អមានលេខ ៤ និង ៩ ខណៈពណ៌ល្អមានពណ៌ស ខៀវ និងមាស ហើយទិសជាជោគសំណាងល្អមានទិសឧត្តរ (ជើង) ពាយ័ព្យ (ជើងឈៀងខាងលិច) និងទិសបស្ចឹម (លិច) និងខែដែលល្អគឺខែ ៨ និងខែ ១២ តាមចន្ទគតិចិន(ខែកញ្ញា និងខែមករា)។
ចំណែកវត្ថុ និងគ្រឿងមិនល្អសម្រាប់ឆ្នាំវកនោះរួមមាន លេខ ២ និង ៧ គឺជាលេខមិនល្អ ពណ៌ក្រហម និងស៊ីជម្ពូជាពណ៌គ្មានសំណាង ខណៈទិសទក្សិន (ត្បូង) និងអគ្នេយ៍ (ត្បូងឈៀងខាងកើត) ជាទិសមានគ្រោះកាច និងខែមិនល្អគឺខែ ៧ និងខែ ១១ តាមចន្ទគតិចិន (ខែសីហា និងខែធ្នូ)។
សម្រាប់គ្រឿងរណ្ដាប់ និងបណ្តាំផ្ញើខានមិនបានសម្រាប់សែនទទួលទេវតាឆ្នាំថ្មីចិនឆ្នាំ វក ឆ្នាំ ២០១៦ នេះហោរាសាស្ត្រចិនលោក អ៊ៅ ណន មានប្រសាសន៍ថា៖ «បងប្អូនខ្មែរដែលមានជាប់ឈាមជ័រចិនទាំងអស់ គួរតែរៀបចំទីតាំងនៃរាសីជើងធូបជង្ក្រានបាយឲ្យបានត្រឹមត្រូវល្អតាមក្បួន ហុងស៊ុយ បើទោះបីជាស្ថិតនៅក្នុងឆ្នាំណាក៏ដោយនៃចំណោមឆ្នាំទាំង ១២ គឺ ត្រូវរៀបចំឲ្យបែរមុខទៅផ្លូវចូលផ្ទះ ដោយមិនឲ្យនៅខាងក្រោយបង្គន់ ឬ បន្ទប់ទឹក និងនៅខាងក្រោមបង្គន់ ឬ បន្ទប់ទឹកឡើយព្រោះនិមិត្តរូបខាតលាភ។
ចំណែកគ្រឿងដង្វាយសែន ទទួលទេវតាវិញ ផ្លែក្រូចពណ៌ក្រហម ឬ ផ្លែសូដា ជាសំណែនចាំបាច់ដែលខានមិនបាន ក្រៅពីសំណែនផ្សេងៗ។ ហើយបើតាមក្បួនចិន ឆ្នាំវក ឆ្នាំនេះ ទេវតាចូលចិត្តសោយផ្លែ អាសង់ខៃ ខណៈឆ្នាំនេះយើងអាចយកផ្លែក្រូចពណ៌ក្រហម ឬផ្លែសូដាធ្វើជាសំណែន»៕
ប្រភព៖Khmerpost
ក្បួនតម្រាទស្សន៍ទាយជោគជតារាសីទាំង ១២ ឆ្នាំរបស់ចិនប្រចាំឆ្នាំ វក ២០១៦
Reviewed by Thida Khmer
on
6:36:00 PM
Rating:
Reviewed by Thida Khmer
on
6:36:00 PM
Rating:
No comments: