ប្រធានក្លឹប Buriram ទទួលស្គាល់ចំណុចខ្សោយ ក្រោយចាញ់ Cam-All Star ៦-៥

ភ្នំពេញ៖លោក Chidchob ប្រធានក្លឹបជើងឯកលីកកំពូលថៃ Buriram United បានសម្ដែងនូវភាពសោកស្ដាយជាខ្លាំង សម្រាប់ការបរាជ័យក្រោមថ្វីជើងក្រុមម្ចាស់ផ្ទះកម្ពុជា Cambodia All Star ដោយលទ្ធផល ៦-៥ ក្នុងជំនួបមិត្តភាពអន្ដរជាតិ ដើម្បីសប្បុរសធម៌ ដែលទើបបញ្ចប់នៅយប់ថ្ងៃទី២៣ ខែមករា ឆ្នាំ២០១៦នេះ ។

បន្ទាប់ពីទទួលរងបរាជ័យក្រោមថ្វីជើងក្រុម Cambodia All Star លោក Newin Chidchob បានសរសេរខកចិត្តមួយ បង្ហោះនៅលើ Page ផ្ទាល់របស់ក្លឹប Buriram United ដោយបុរសជនជាតិថៃរូបនេះ បានលើកឡើងថា កីឡាកររបស់លោកបានចាប់ផ្ដើមយ៉ាងល្អ នៅតង់ទី១ ដែលអាចរកបានគ្រាប់បាល់នាំមុខ ១-០ លើក្រុម Cambodia All Star របស់កម្ពុជា ។ ប៉ុន្ដែការនាំមុខនោះ បែរជាធ្វើកីឡាកររបស់ខ្លួន មានការធ្វេសប្រហែស នាំឲ្យកីឡាករកម្ពុជា មានឱកាសរកបានគ្រាប់បាល់តាមស្មើទៅវិញ ។

លោក Newin Chidchob បានបញ្ជាក់ថា «ក្នុងការប្រកួតនេះ កីឡាករយើងបានប្រើអស់បច្ចេកទេស និងទិចនិករបស់ខ្លួនហើយ ប៉ុន្ដែយើងនៅតែមានចំណុចខ្លាំង និងចំណុចខ្សោយ ។ ខ្ញុំសូមអគុណដល់កីឡាករ ដែលខិតខំអស់ពីសមត្ថភាព ដើម្បីប្រកួតប្រជែង ប៉ុន្ដែខ្ញុំសុំទោសអ្នកគាំទ្រ ចំពោះលទ្ធផលមិនល្អនេះ» ។

គួរបញ្ជាក់ថា សម្រាប់ជំនួបមិត្តភាពអស្ចារ្យនេះក្រុម Buriram United បានទទួលគ្រាប់បាល់នាំមុខ ១គ្រាប់មុននឹងបញ្ចប់តង់ទី១ ។ បន្ទាប់មកទើបកីឡាករ ប្រាក់ មុន្នីឧត្តម រកបានគ្រាប់បាល់តាមស្មើ ១-១ វិញ នៅដើមតង់ទី២ ។ បន្ដិចក្រោយមកកីឡាករប្រេស៊ីលរបស់ Buriram United បានធ្វើសម្រេចគ្រាប់បាល់នាំមុខជាថ្មី ប៉ុន្ដែត្រូវខ្សែប្រយុទ្ធឆ្នើម ចាន់ វឌ្ឍនាកា វាយបកតាមស្មើវិញ ២-២ រហូតដល់ចប់ការប្រកួពេញម៉ោងតែម្ដង ។
ប៉ុន្ដែដោយសារការប្រកួតមិត្ដភាពនេះ តម្រូវឲ្យមានក្រុមឈ្នះ និងចាញ់ ដើម្បីលើកពាននោះ គណៈកម្មការតម្រូវឲ្យក្រុមទាំងពីរ ប្រកួតរកឈ្នះ និងចាញ់ ដើម្បីក្លាយជាម្ចាស់ពានមិត្តភាពជាប្រវត្តិសាស្ដ្រនេះ តាមរយៈការទាល់បាល់ប៉េណាល់ទីចម្ងាយ ១១ម៉ែត្រចំនួន ៥គ្រាប់ម្ខាង ដើម្បីកាត់សេចក្ដី ហើយលទ្ធផល ក្រុម Cambodia All Star ជាអ្នកឈ្នះ ក្រោយធ្វើសម្រេចបាន ៤គ្រាប់ រីឯកីឡាករ Buriram United ធ្វើសម្រេចបានត្រឹម ៣គ្រាប់ប៉ុណ្ណោះ៕